ប្រទេសចិន ៖ ផ្សាយកាលពីថ្ងៃទី១០មីនាកន្លងទៅដោយកាសែតញូវយ៉កប៉ុស្តិ៍ បន្ទាប់មកដកស្រង់ផ្សាយដោយសារព័ត៌មានអន្តរជាតិជាច្រើន វីដេអូមួយបង្ហាញពីដង្កូវដ៏ច្រើនសាចដូចទឹកភ្លៀងមិនដឹងមកពីណានៅតាមដងវិថី ដោយបណ្ដារថយន្តគ្របដណ្ដប់ដោយដង្កូវ។
រូបភាពទាំងនោះថតនៅខេត្តលីអាវនីញ ដោយកាសែតញូវយ៉កប៉ុស្តិ៍រាយការណ៍ពីភ្លៀងសត្វល្អិត ដែលជាគ្រោះមហន្តរាយខាងជីវសាស្ត្រមួយ វា.យប្រហារលើខេត្តនោះនាភាគឦសានចិន។ វីដេអូមួយបង្ហាញតំបន់ដែលហាក់ដូចជាគ្របដណ្ដប់ដោយដង្កូវតូចៗ ពាសពេញគ្រប់កន្លែង។ កាសែតនោះបានដកស្រង់ការលើកឡើងរបស់វេបសាយព័ត៌មានវិទ្យាសាស្ត្រMOTHER NATURE NETWORK ដែលនិយាយថា ព្រឹត្តិការណ៍បែបនោះតែងកើតមានជាទូទៅក្រោយព្យុះមួយ ដែលក្នុងពេលព្យុះខ្យល់បោកបក់ខ្លាំងបានផាត់បណ្ដាសត្វល្អិតមកផ្ដុំគ្នាលើតំបន់ចម្ងាយច្រើនគីឡូម៉ែត្រ រួចពេលខ្យល់ស្ងប់ទៅវិញ ភ្លៀងសត្វល្អិតក៏ចាប់កកើតឡើង។
ក្នុងវីដេអូដែលគេតាមដានមើលច្រើនបំផុតតាមTWITTERនិងTIK TOK បង្ហាញថាប្រជាជនហាក់មិនភ័.យខ្លា.ច ហើយនៅតែនាំគ្នាដើរចេញក្រៅដោយគ្រាន់តែទទូរឆ័ត្រ ចៀសវាងកុំឲ្យពួកវាធ្លាក់លើខ្លួន។ ប៉ុន្តែតាមសារព័ត៌មានចិនជាច្រើនថា កាសែតវ៉ាស៊ីនតោនប៉ុស្តិ៍ប្រហែលជាច្រឡំហើយ។ នោះមិនមែនជាសត្វល្អិតទេ តែជាផ្កា PEUPLIER ដែលមានសណ្ឋានដូចដង្កូវវែងពណ៌ប្រផេះ។
រឿងនោះក៏ត្រូវបានស្រង់ផ្សាយតាមបណ្ដាញសង្គមដែរ។ កាសែតហ្សាម៉ាអ៊ិកមួយឈ្មោះJAMAICA OBSERVER ដែលចាប់អារម្មរណ៍លើរឿងនោះដែរ បានសម្ដែងការយល់ស្របតាមការលើកឡើងរបស់អ្នកលេងអ៊ីនធើរណេតម្នាក់តាមTWITTER ដែលនិយាយថា ទាំងនោះមិនមែនជាដង្កូវឬក៏ជាសត្វអ្វីដែរ តែជាទងផ្កាដែលធ្លាក់រោយពីដើមឈើ។ ទោះបីយ៉ាងណាមកទល់ពេលនេះ មិនទាន់មានការអះអាងបញ្ជាក់ច្បាស់ពីរឿងនេះនៅឡើយ៕
